ਰੂਸ ’ਚ ਇੱਕ ਔਰਤ ਨੂੰ 12 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਉਸ ਨੇ ਯੂਕਰੇਨ ਨਾਲ ਜੁੜੀ ਇੱਕ ਚੈਰਿਟੀ ਸੰਸਥਾ ਰਜ਼ੋਮ ਨੂੰ 50 ਡਾਲਰ (ਕਰੀਬ 4200 ਰੁਪਏ) ਦਾਨ ਕੀਤੇ ਸਨ। ਔਰਤ ਦਾ ਨਾਂ ਕਸੇਨੀਆ ਖਵਾਨਾ (33) ਹੈ। ਉਸ ਕੋਲ ਅਮਰੀਕੀ ਨਾਗਰਿਕਤਾ ਹੈ। ਕਸੇਨੀਆ ਨੂੰ ਇਸ ਸਾਲ ਫਰਵਰੀ ‘ਚ ਰੂਸੀ ਸ਼ਹਿਰ ਯੇਕਾਟੇਰਿਨਬਰਗ ਤੋਂ ਗ੍ਰਿਫਤਾਰ ਕੀਤਾ ਗਿਆ ਸੀ। ਇਹ ਮਾਸਕੋ ਤੋਂ 1600 ਕਿਲੋਮੀਟਰ ਪੂਰਬ ’ਚ ਸਥਿਤ ਹੈ। ਉਹ ਇੱਥੇ ਆਪਣੀ ਦਾਦੀ ਨੂੰ ਮਿਲਣ ਆਈ ਸੀ। ਵਿਆਹ ਤੋਂ ਪਹਿਲਾਂ, ਉਸਦਾ ਨਾਮ ਕਸੇਨੀਆ ਕਰੀਲੀਨਾ ਸੀ। ਪਿਛਲੇ ਹਫ਼ਤੇ ਉਸ ਖ਼ਿਲਾਫ਼ ਮੁਕੱਦਮਾ ਚੱਲਿਆ ਸੀ, ਜਿਸ ਵਿਚ ਉਸ ਨੂੰ ਦੋਸ਼ੀ ਪਾਇਆ ਗਿਆ ਸੀ।
ਕਸੇਨੀਆ ਨੂੰ ਅਦਾਲਤ ਵਿਚ ਇੱਕ ਯੂਕਰੇਨੀ ਸੰਗਠਨ ਨੂੰ ਪੈਸੇ ਦੇਣ ਦਾ ਦੋਸ਼ ਲਗਾਇਆ ਗਿਆ ਸੀ ਜੋ ਯੂਕਰੇਨੀ ਫੌਜ ਨੂੰ ਹਥਿਆਰ ਅਤੇ ਗੋਲਾ ਬਾਰੂਦ ਖਰੀਦਣ ਵਿਚ ਮਦਦ ਕਰਦੀ ਹੈ। ਕਸੇਨੀਆ ਦੇ ਵਕੀਲ ਨੇ ਕਿਹਾ ਕਿ ਉਹ ਅਦਾਲਤ ਦੇ ਫੈਸਲੇ ਨੂੰ ਉੱਚ ਅਦਾਲਤ ’ਚ ਚੁਣੌਤੀ ਦੇਵੇਗੀ।
